Studieplan for Norsk, påbyggingsstudium (30 studiepoeng) (2017–2018)
Fakta om programmet
- Studiepoeng:
- 30
- Studiets varighet:
- 1 år
- Undervisningsspråk:
- Norsk
- Studiested:
- Studiet er nettbasert. I tillegg blir det arrangert frivillige samlingar på studiestad Halden. Sjå Organisering og læringsformer.
Informasjon om studiet
Påbyggingsstudiet i norsk gir studentar som allereie har 60 studiepoeng (årsstudium) i norsk eller tilsvarande utdanning moglegheit til å vidareutvikle kompetansen sin i norsk/nordisk språk og litteratur. Det er eit fleksibelt, nettbasert studium der aktuelt fagstoff blir samla på læringsplattform og forelesningar skjer via digitalt samarbeidsverktøy. Rettleiing blir gitt enten på nett eller på studiestad Halden. Tre gongar i semesteret er det frivillige samlingar på studiestad Halden.
Studiet blir regulert av gjeldande forskrift om eksamen og studierett ved Høgskolen i Østfold.
Hva lærer du?
Studiets læringsutbytte
Kunnskap
Kandidaten
- har brei kunnskap om språkdidaktiske, teoretiske og tilhøyrande metodiske problemstillingar relevant for norskfaget
- har god kunnskap om eit spesifikt tema innanfor norsk/nordisk litteratur, f.eks. ein bestemt sjanger, ein litteraturhistorisk periode eller eit forfattarskap
- har god kunnskap om eit spesifikt tema innanfor norsk/nordisk språk, f.eks. i moderne norsk grammatikk, kontrastivt mellom nordiske språk eller språkhistoriske analysar
Ferdigheter
Kandidaten
- kan anvende litteraturteori i lesing av litterære tekstar
- kan anvende kunnskap om språkstruktur i praktiske analysar med ulike innfallsvinklar
- kan gå i dialog om eiga skriving og nyttiggjere seg rettleiing i samband med oppgåveskriving og munnlege presentasjonar
- kan reflektere over korleis språklege og litterære fordjupingstema kan vere relevante for norskundervisning på ulike klassetrinn
Generell kompetanse
Kandidaten
- kan formidle sentralt fagstoff både skriftleg og munnleg
- kan planlegge og gjennomføre formidling av eit bestemt norsk/nordisk litterært tema med bruk av litteraturteori
- kan planlegge og gjennomføre formidling av eit bestemt norsk/nordisk språkleg tema, inkludert teoretisk og/eller metodisk refleksjon
Opptak
Bestått årsstudium i norsk, eller tilsvarende utdanning på minimum 60 studiepoeng.
Oppbygging og gjennomføring
Studiets oppbygging og innhold
Norsk påbygging er bygd opp av to emne som kvart er på 15 studiepoeng, eitt språkemne og eitt litterært emne. Emna kan variere frå år til år. Studieåret 2017/2018 tilbyr vi desse emna:
- NORP201 Norsk/nordisk språkstruktur før og nå (haustsemesteret)
- NORP202 Norsk/nordisk dramatisk litteratur (vårsemesteret)
Sjå studiemodell.
Målet med studiet er å gi studentane solid fagleg basis som er relevant for undervisning i norsk i grunnskolen og i den vidaregåande skolen, og relevant for vidare masterstudium i norsk. Medan Norsk årsstudium (60 studiepoeng) - og tilsvararande Norsk 1 (30 studiepoeng) og Norsk 2 (30 studiepoeng) ved Høgskolen i Østfold er breiddestudium, er Norsk påbygging (30 studiepoeng) eit djupstudium i utvalde enkelttema.
Studiet er bygd opp rundt desse hovudpunkta:
- Studium av litteraturvitskapleg teori og metode
- Temastudium i norsk/nordisk litteratur
- Studium av språkteori og metode
- Temastudium i norsk/nordisk språk
- Norskdidaktiske problemstillingar
Det faglige innhaldet i emna NORP201 og NORP202 vil kunne variere frå år til år, men ein vil heile tida prøve å sjå norsk i eit internasjonalt perspektiv, og trekke inn relevante norskdidaktiske problemstillingar. Val av tema vil bli presentert for studentane i god tid før studieåret begynner. Studiet krev òg at studentane syner ei fagleg-vitskapeleg haldning til stoffet. Begge emna inneheld obligatorisk skriftleg og munnleg arbeid. Sjå emnebeskrivingar.
Organisering og læringsformer
Studiet er nettbasert. I tillegg blir det arrangert frivillige samlingar på studiestad Halden.
Høgskolen stiller krav om at studentane disponerer eigen berbar PC i dette studiet.
Høgskolen gir nettmøte i synkron tid, omlag to timer kvar veke. Resten av den nettbaserte aktiviteten skjer på valfritt tidspunkt/asynkront. Det blir ikkje gitt nettmøte dei vekene det er arrangert samling på studiestaden.
Tre gongar i semesteret blir det heldt todagars-samlingar, der fagstoffet blir bearbeidd og utdjupa. Resten av undervisninga vil vere nettbasert - blant anna med nettmøte, deling av skjermopptak og opptak av forelesingar, diskusjonsforum, og andre skriftlege og munnlege arbeidsformer som kan gjennomførast digitalt.
Studentane skal samtale om faglitteratur og samarbeide om tolkings- og analyseoppgåver via digitale verktøy. Det blir også anbefalt at studentane brukar digitale verktøy for å diskutere faglege spørsmål utanom planlagt undervisning. Det blir gitt opplæring i dei verktøya som skal brukast. Tekniske spesifiseringar og krav blir klargjort og informert om før semesterstart.
Studieinnsats
Studieinnsatsen er berekna til 400 timar per semester, inkl. timeplanlagt undervisning (nettmøte/samling), sjølvstudium, arbeidskrav, eksamensførebuing og eksamensgjennomføring.
Bruk av bibliotek
Biblioteket organiserer og bidrar til studentanes informasjonskompetanse, det vil seie evna til å søke etter, finne, evaluere og bruke relevant fagleg informasjon. I tillegg til personleg service, får studentane bibliotekundervisning der målsettinga er at dei skal kunne søke i norske og utanlandske informasjonskjelder og kunne vurdere kvaliteten på informasjonen. Biblioteket tilbyr også undervisning i referanseteknikk.
Arbeidskrav
Det er knytt arbeidskrav til studiet. Arbeidskrav må være levert innan bestemte fristar og vere godkjende før studenten kan framstille seg til eksamen. Sjå dei enkelte emnebeskrivingane for meir informasjon.
Undervisningsspråk
Undervisningsspråket er norsk/nordisk og det blir stilt krav om bruk av begge målformer i skriftlege arbeid.
Praksis
Det er ikkje knytt rettleidd praksis til studiet.
Evaluering av studiet
For å kunne tilby ei aktuell og relevant utdanning av god kvalitet er vi avhengige av tilbakemelding frå studentane og at kvar enkelt student deltar i evaluering av studia. Dette studieprogrammet blir jamleg evaluert for å sikre og utvikle kvaliteten i programmet.
Det enkelte fagmiljø har ansvar for å etablere faste og allment kjente evalueringsrutinar på emnenivå (kalla EVA3). Sjå emnebeskriving for detaljar.
Tilbakemelding underveis
Det blir gitt tilbakemelding på obligatoriske arbeidskrav og frivillige gruppeoppgåver. Tilbakemelding og rettleiing kan skje fulldigitalt (skriftleg og munnleg) eller ved personleg oppmøte og/eller på samlingar på campus. Sjå emnebeskrivingar.
Vurdering
Studentane blir prøvd i både munnlege og skriftlege eksamensformer, og vurderingsordningane skal bidra til at studenten oppnår læringsutbytte / måle oppnådd læringsutbytte.
Arbeidskrav blir vurdert med uttrykket godkjend/ikkje godkjend. Sluttvurdering blir vurdert med karakteruttrykket A-F. Sjå emnebeskrivingar.
Oppgåvesvara skal ha eit kritisk, analytisk og reflekterande innhald, vere i tråd med angitte sjangerkrav, og innehalde tydelege referansar til dei kjeldene som er brukt.
Alle emne og arbeidskrav kan bli gjenstand for plagiatkontroll. Oppgåvesvar som er heilt eller delvis identiske vil ikkje bli godkjend og vil bli sett på som forsøk på fusk. Sjå elles forskrift om eksamen og studierett ved Høgskolen i Østfold.
Litteratur
Sjå emnebeskrivingar. Oppdatert før kvart semester.
Jobb og videre studier
Studiet kan gå inn som ein del av ein bachelorgrad eller som vidareutdanning i norsk.
Studentar som har ein bachelorgrad som inkluderer 90 studiepoeng i norsk (norsk årsstudium og norsk påbygging eller tilsvarande), vil normalt vere kvalifisert for opptak til masterstudium i norsk/nordisk, for eksempel Masterstudium i norsk i skolen ved Høgskolen i Østfold.
Sjå dei einskilde masterutdanningene for meir informasjon om opptakskrav.
Studieplanen er godkjent og revidert
Studieplanen er godkjent
Avdeling for lærarutdanning, dekan Unni Hagen, 09.02.2017.Studieplanen gjelder for
2017-2018Studieprogramansvarlig
Fakultet for lærerutdanninger og språkStudiemodell
Høst 2017
Velg studieretning for å se emner
Vår 2018
Velg studieretning for å se emner