Tidsbruk:
15-30 minutt
Forslag til gjennomføring
- Læraren vel ein song, ei lydfil eller ein video og plukkar ut enkeltord, uttrykk eller frasar frå teksten som han eller ho viser på tavla.
- Elevane jobbar i par. Dei skriv orda frå tavla på lappar (eitt ord per lapp) og samlar dei i ein bunke.
- Elevane byter på å trekkje ein lapp og lese ordet høgt. Dersom begge elevane kjenner ordet frå før, skriv dei initialane sine på lappen og legg lappen i ein bunke. Ukjende ord eller ord som berre éin av elevane kjenner frå før, skal leggjast i ein annan bunke.
- Elevane går gjennom denne bunken saman, gjerne med hjelp av ordbok.
- Når elevane har kontroll på alle orda, spreier dei lappane frå begge bunkane ut på bordet og deler dei inn i minst to, men gjerne fleire, kategoriar. Elevane står fritt til å bestemme kva slags kategoriar dei vil bruke.
- Læraren ber kvar gruppe fortelje kort kva slags kategoriar dei har valt – og kvifor. Dette kan skje på norsk.
- Til slutt deler læraren ut teksten eller viser han på skjermen, og klassen kan begynne å jobbe med han.