Tripp trapp tale opnar for semantiske samtalar der elevane får ei djupare forståing for omgrep. Samtalane tek form gjennom klare oppdrag i ei «omgrepstrapp» (sjå til dømes nettversjonen av ressursen på heimesida til Framandspråksenteret). For elevar på lågare språknivå vil oppdragsspørsmåla i trappa òg fungere som nyttig snakkehjelp. Aktiviteten rommar fleire strategiar, mellom anna det å få ord/omgrep til å feste seg gjennom å assosiere og forklare noko for andre.
Forslag til gjennomføring
- Elevane dannar par
- Elevane får utdelt ark med ei omgrepstrapp med oppdragsspørsmål
- I tillegg får kvar elev fire–fem omgrep. Dei må ikkje vise omgrepa til medelevane
- Elevane får tid til å tenkje over omgrepa sine og spørsmåla i omgrepstrappa
- Deretter skal dei vekselvis forklare eitt og eitt omgrep ved å «gå opp trappa». Dei beskriv omgrepet ved hjelp av spørsmåla på veg opp trappetrinna, men utan å bruke sjølve ordet
- Medeleven skal ved toppen av trappa gjette kva omgrep det er snakk om
Førebuingar
- Klargjere omgrepstrapp med spørsmål. Spørsmåla vil endre seg dersom ein arbeider med meir abstrakte omgrep
- Lage omgrepslappar