Dette er ei munnleg aktiviserande puslespeloppgåve. Med utgangspunkt i ein del av eit bilete går elevane rundt i klasserommet og ber om informasjon for å finne den eller dei som har resten av biletet. Det konkrete og visuelle utgangspunktet som biletbiten representerer, fungerer som ein igangsetjar for munnleg produksjon og interaksjon. Aktiviteten engasjerer elevane til å stille spørsmål, lytte og respondere for å få svar på om dei er kvarandre sin biletmatch.
Forslag til gjennomføring
- Kvar elev får utdelt ein del av eit bilete (puslespelbit)
- Eleven skal halde biletbiten skjult for medelevane
- Elevane studerer sin eigen biletbit og tenkjer på kva ordforråd og formuleringar dei har bruk for når dei skal snakke om biletet
- Deretter går elevane rundt i klasserommet og stiller spørsmål om biletbitane til kvarandre
- Elevane held fram med å spørje og svare til dei finn biletmatchen sin/biletmatchane sine • Dei som har funne biletmatchen sin, utgjer ei gruppe
- Biletet kan brukast som utgangspunkt for mange andre munnlege øvingar òg, til dømes biletbeskrivingar, rollespel eller kreativ munnleg forteljing
Førebuingar
- Finne bilete til ønskt tema og skrive dei ut i A4-format
- Klippe opp dei valde bileta i puslespelbitar (2–3). Pass på at bitane har noko attkjenneleg som gjer elevane i stand til å finne tilbake til originalbiletet
- Eventuelt formulere oppgåver til vidare arbeid med biletet